Handa ang siudad nga bayaran ang mga baboy sang mga hog raisers nga madalahig sa culling ukon pagpatay sang sapat nga yara sa nasakpan sang 500 meter radius nga posible apektado sang kaso sang African Swine Fever.
Suno kay Acting Mayor Jude Thaddeus Sayson, kinahanglan nga naka rehistro sa barangay ang mga hog raisers agud nga matagaan sila sang ayuda.
P3,000 ang para sa kada baktin, P5,000 sa fattening kag P7,000 sa nayon. Wala nalakip ang patay na nga baboy.
Maga gikan ang pondo para sa indemnity fund sa Disaster Risk Reduction Management Office.
Ginapabaskog naman karon sang Anti-ASF task force ang monitoring kag border control inspection agud mapangapinan ang hog industry.
Hugtan man ang mga pagsulundan batuk sa pagpilak sang mga patay nga baboy sa bisan diin lang agud mapunggan ang paglaton sang balatian.