Gin aprobahan na sang Department of Agriculture ang 10 million pesos nga ginhinyo sang Sugar Regulatory Administration para matapna ang paglapta sang red-striped soft-scale insects ukon RSSI nga naga apekto sa mga tubo.
Ini suno kay Agriculture Secretary Francisco Tiu Laurel, Jr., nga yari sa probinsya sang Hwebes kag nag patigayon sang inspection sa mga katubuhan nga na igo sang RSSI.
Ginsiling ni SRA Administrator Pablo Luis Azcona nga ginsaksihan ni Laurel ang testing sang mobile pesticide spray system sang DA NIR sa isa ka farm malapit sa Bacolod Silay Airport nga na igo sang peste.
Suno kay Azcona gamiton sang SRA ang P10M sa pagbakal sang pesticide bilang quick emergency response labi na sa mga katubuhan sang mga land reform beneficiaries.
546.10 hectares na sang katubuhan, mayoriya ang yara sa Negros Occidental ang na-igo sang amo nga peste sa tubo.
Ang RSSI ang nag apekto sang katubuhan sa 46 ka mga barangay sa 13 ka mga banwa kag siudad sa Negros Occidental, kag tig isa ka banwa sa Negros Oriental, Capiz kag Iloilo base sa June 5 nga datus sang SRA.
294 naman ka mga sugar farmers ang apektado.