Ipanagtag na buwas nga adlaw, Miyerkules, ang mga allowances sang mga atleta nga maga tiglawas sang siudad sang Bacolod para sa labing nahauna nga Negros Island Region Association Athletic Meet.
Ang tagsa ka mga atleta ang makakuha sang ila allowance nga 10,500 pesos gikan sa siudad.
Ginsiling ni Atty. Marty Go, Secretary to the Mayor, nga pagahiwaton buwas sa Bacolod City National High School Gymnasium ang pag-release sang allowances.
Kadungan sini amo man ang send-off ceremony sang mga atleta.
Nagpa-in ang siudad sang Bacolod sang 28.2 million pesos para sa mga kinahanglanon sang masobra sa 900 ka mga tiglawas sang siudad.
Lakip diri amo ang ila allowance para sa isa ka semana nga kompetisyon, mga sporting gears, jerseys, kag training fees.
Naghatag man ang siudad sang 27 million pesos sa Department of Education bilang bulig nga pundo para sa pag host sang amo nga kompetisyon.
May 13 naman ka mga billeting areas ang naplastar na sang siudad agud tiniran sang mga atleta gikan sa iban nga probinsya.
Amat-amat na nga mag-abot ang mga atleta sang iban nga mga probinsya sini nga semana. Yara sa 15,000 ang ginapaabot nga magtambong sa amo nga kompetisyon.
Ini ang pinaka-una nga athletic meet sang Negros Island Region kag magasugod ini sa Domingo, Marso 1 tubtob Marso 7.*
[sibwp_form id=1]