P1.5M nga utang sang siudad sang Bacolod sa kuryente sang mga eskwelahan ang nabayaran na.
Ginalantaw man sang siudad ang pag-offset sang franchise tax sang Ceneco sa P287M nga arrears sang siudad.
Na-release na sang siudad ang P1.5M nga tseke nga bayad sa Central Negros Electric Cooperative para sa March billing, ilabi na para sa nakunsumo nga kuryente sang siudad kag sang 51 ka mga elementary school sa Bacolod.
Sang Miyerkoles nautdan sang kuryente ang napulo ka mga eskwelahan, duha diri mga high school matapos wala mabayaran sang siudad ang ila bill.
Nangayo na sang pasaylo ang pamuno sang Ceneco kag nagpasalig sa siudad nga indi na masulit ang ginakabig miscoordination kabangdanan nautdan kuryente ang mga eskwelahan samtang naga-klase.
Suno kay City Administrator Pacifico Maghari, III, ila naman karon ginalantaw nga ma-offset ang masobra P90M nga balayran sang Ceneco para sa franchise taxes sa kapin P287M nga arrears sang siudad.
Plano man sang siudad nga magtukod sang infrastructure projects para sa distribution utility agud nga mabuhin ini sa nabilin nga utang sang siudad.