Kapulisan nakakumpiskar sang P1.3M nga balor sang butane canisters kag paraphernalia gikan sa lima ka mga persona.
Arestado sang kapulisan ang lima ka mga persona matapos makuhaan sang butane canisters kag iban pa nga paraphernalia sa ginpatigayon nga entrapment operation sa Hacienda Elisa, Barangay Granada sa syudad sang Bacolod sadtong Martes, Hulyo 29.
Mga residente sang Isabela sa Negros Occidental ang mga gindakup.
Nagabalor sang P1,320,000 ang narekober nga mga butane canisters kag paraphernalia.
Ginpatigayon ang entrapment sang katapo sang Criminal Investigation and Detection Group Regional Field Unit-Negros Island Region.
Suno sa CIDG, ginadumili ang iligal nga refinery, manufacturing, importation kag retail sang liquified petroleum gas.
Nagapangatubang ang mga gindakup sang kaso angut sa paglapas sang Presidential Decree 1865, nga naga-regulate kag nagapina sa mga iligal nga aktibidad may angut sa petroleum kag by products, nga gin-amend sang Republic Act 11592 ukon ang LPG Industry Regulation Act.
