Dakup ang tatlo ka mga persona matapos makuhaan sang kapin P1.2M nga balor sang gina-alegar smuggled nga sigarilyo sa national highway sang Barangay Panubigan, siyudad sang Canlaon sa Negros Oriental.
Sakay ang mga gindakup sa isa ka puti nga Mitsubishi L300 van nga wala sang plaka sang sila ang maglabay sa checkpoint sang kapulisan, Miyerkules sang tungang gab-i.
Karga sa sulod sang nasambit nga van ang nagkalain-lain nga klase sang sigarilyo, iban diri ang mga imported kag may estimated value nga P1,232,000.
Suno sa kapulisan, wala sang may nakit-an nga customs seal sa nasambit nga mga reams sang sigarilyo kag wala man sang dokumento nga napakita ang mga gindakup.
Gindala sa Canlaon City Police Station ang mga gin-aresto, pati na ang mga nakumpiskar nga sigarilyo kag van.
Magapangatubang sa kaso nga paglapas sa Customs Modernization and Tariff Act ang mga gindakup.