Mga organic kag locally produced products sa karon ang sarang mabakal sa likod sang Food Terminal Market sang Negros Occidental nga yara sa North Capitol Road-San Juan Streets sa Bacolod City.
Organic nga prutas kaangay sang mangga, abokado, saging, dragon fruit kag iban pa, kasubong man utan kag mga kararuton ang sarang nga mabakal.
May mga tanom man kag iban pa gid nga produkto nga himo sang mga katapo sang nagkalain- lain nga mga people’s organization ang pwede mabakal. Sang Lunes nag sugod kag maga lawig tubtob sa Biernes ang pag baligya sang mga 20 ka people’s organization.
Ang kahiwatanan may angut sa pagsaulog sang 31st Provincial Environment Month nga may tema, “Solutions to Plastic Pollution”.
Gina haylo ang pagdala sang mga bumalakal sang ila nga mga eco-bag ukon mga reusable bags. Gina likawan ang pag gamit sang single use plastic.
Suno sa mga manugbaligya ang kasubong nga higayon ang naga bulig sa ila sa pagduso kag pagpakilala pa gid sang ila nga mga produkto. Sa nabilin nga duha ka adlaw nagalaum sila nga tigayon sila nga makabawi.