Ang tagsa ka barangay na sa Bacolod City ang hatagan sang siudad sang otoridad nga mag-issue sang prangkisa sa mga electric bikes nga nagabyahe sa ila nga lugar.
Ini matapos nga gin-aprubahan na sang Sanguniang Panlungsod ang ordinansa nga ginduso ni Councilor Dindo Ramos, Miyerkules nga adlaw.
Sandig sa amo nga ordinansa, ginahaylo ang mga barangay nga magdihon man sang kaugalingon nga barangay ordinance para sa mga e-bike nga nagabiyahe sa ila nga barangay.
Ila ibutang sa amo nga ordinansa, kon sa diin ipahamtang ang terminal sang mga e-bikes sa ila nasakpan, otorisado nga rota, kag ang kantidad kun pila ang balayran sang isa ka drayber agud magkuha sang prangkisa.
Suno kay Ramos, barangay naman mismo ang mapasa sang fix fare rate para sa mga nagabiyahe sa ila lugar.
Apang, antes mahatagan sang prangkisa ang isa ka ebike driver, kinahanglan nga magpaidalum siya anay sa training sang Bacolod Transport and Traffic Management Department.
Kun matapos na niya ang training, pagahatagan siya sang siudad sang driver’s license nga nagahatag sa iya sang kapasidad nga magkuha sang pasahero.
Pagklaro ni Ramos, sarang man nga marevoke ang prangkisa sang isa ka e-bike kun madakpan ang drayber sang BTTMD nga nagabyahe sa gwa sang iya rota, sulit-sulit nga traffic violations, kag kun indi na maayo ang kahimtangan sang ginadala niya nga e-bike.
Kun may prangkisa na ang drayber gikan sa barangay, kinahanglan man siya sa gihapon magkuha sang business permit sa siudad agud mangin legal na ang iya pagbiyahe.
“Dapat ma-comply gid sila, i-regulate gid sila [e-bike drivers] kon pila lang sila kabilog in a certain barangay kag kon ang Barangay gani mag in close sya sa isa ka barangay or may ruta sa iban nga Barangay, it should be subject to Barangay resolution nga gina-allow ya ina nga ruta to pass through the area of jurisdiction sang isa ka barangay. Provided nana sa aton da nga ordinance nga indi sila ka pagusto-gusto”, suno kay Ramos.
[sibwp_form id=1]