Naga inventory ang Office of the Civil Defense kun pila pa ang nabilin nga mga internally displaced persons sa mga evacuation center sang mga banwa kag siudad nga nag patuman na sang decampment.
Suno kay Office of the Civil Defense Regional Director, Donato Sermeno, III, nag papauli na sang Kanlaon evacuees ang Canlaon City kag La Castellana sang nagligad nga semana pero may mga evacuees nga wala nakatigayon pa pauli bangud isa sa mga rason amo nga naguba na ang ila nga balay.
Sa La Castellana, may 61 ka pamilya ukon 213 ka indibidual ang yara pa sa mga evacuation centers.
Samtang, ang Bago City ang maga papauli sang ila nga mga internally displaced persons sa August 16, pero sa 22 ka pamilya, may siyam ka pamilya ang nagkalagub-an sang balay kag ini sila ang buligan sang LGU bisan pa sang OCD para makatigayon naman balik sa ila nga mga puluy-an.
Ang La Carlota ang natalana pa nga mag sapol bahin sa ila nga decampment.
Samtang ang yara sa evacuation center, ginsiling ni Sermeno damlag pa, nga padayon nga maga baton sang bulig ang mga apektado.
And Department of Human Settlement and Urban Development ukon ang DHSUD ang naga patuman man sang inventory sa nag kalagub-an sang balay para sa assistance nga mahatag.
“Ang DHSUD naga inventory man sila sang mga totally damaged and partially damaged houses kay ma extend sila sang financial assistance”, suno kay Sermeno.
Suno kay Sermeno ang damlag pa assistance nga gin announce nga ipaagi sa Department of Budget ang Management ang gina paabot maga padayon.
Wala man sang abiso nga indi na ini madayon.
“Like for example ang La Castellana, P50 na lang ang bilin sa iya nga Quick Response Fund, for sure tagaan na siya sang assistance ano na lang karon, may mga bagyo pa kita nga gina anticipate”, suno kay Sermeno.
Ang livelihood assistance naman nga gikan sa DSWD ang ginahulat pa kun ano ang mangin abiso sa national office karon nga nag balik na sila sa ila nga mga balay.
