Lubos nga gina kundenar sang New Peoples Army ang kamatayon sang gina alegar sang army nga NPA leader nga si Victoriano Baldonado. Si Baldonado ang napatay sa enkwentro sang NPA kag army sa Barangay Trinidad sa Guihulngan sang Lunes.
Suno sa NPA, indi katapo sang rebelde nga grupo si Baldonado kag siya ang ila gina alegar nga biktima lang sang red tagging sang army.
Ila man ginsiling nga wala sang may natabo nga enkwentro kundi gin patay si Baldonado sa atubang sa iya pamilya. Gina alegar man sang grupo nga may duha ka army nga napatay sa ila gina siling nga pagharas sa tropa sang army.
Apang naga panindugan ang army nga isa ka mataas nga opsiyal sang rebelde ang napatay sa lehitimo nga encounter kag wala man sang may napatay sa ila nga hanay.
Samtang, gin-aku man sang rebelde nga grupo ang pagpatay sa 43 anyos nga si Jovanie Omboy sang Domingo sang gab-i sa Barangay Puso sa La Castellana. Sa statement sang NPA, ila gin siling nga ila ginpatigayon ang silot kamatayon batuk kay Omboy nga ila gina alegar asset sang CAFGU kag regular nga naga report sa army patrol base sang Barangay Montilla.