Gin-ako sang Armando Sumayang Jr Command – New People’s Army, Southwest Negros Guerilla Front ang pagpatay sa isa ka laborer sa Sitio Lumbia, Barangay Camansi, Kabankalan City.
Gin-alegar sang NPA nga isa ka asset sang militar ang biktima nga si alyas “Danny”.
Apang suno kay Police Captain Sammy Gasataya, deputy chief sang Kabankalan PNP, gina-validate pa nila kun ang NPA gid man ang naghimo sang krimen bangud posible ginagamit lamang nila ini bilang stratehiya ukon tactic agud mag-gwa nga mabaskog pa sila.
Ginsulod kag gintiro sang mga armado nga lalaki ang biktima sa iya balay nga yara sa nabukid nga bahin.
Dead on arrival ang biktima sa ospital.
Suno kay Gasataya, under investigation pa ang kaso kag sila ang magabulig sa pamilya nga mahatagan hustisya ang kamatayon sang ila himata.