Ginsiling sang rebeldeng grupo nga ambush ang natabo sa banwa sang Calatrava kag indi encounter, taliw-as sa nangin pahayag sang Pulis.
Gin-ako sang Roselyn Jean Pelle Command sang New People’s Army Northern Negros Guerrilla Front nga sila ang may kahimuan sa pag-ambush sa police patrol vehicle sang Calatrava PNP sa Sitio Calanugan, Brgy. Minapasok, banwa sang Calatrava sang nagligad nga semana.
Sa press release sang grupo, ginpahayag ni Ka Cecil Estrella, Spokesperson sang RJPC-NPA nga sila ang may kahimuan sa pag “ambush” sa mga kapulisan nga ginkamatay ni Police Cpl. Jaime Nuñez, Jr. kag pagkasamad nanday Police Capt. Jesus Alba, Police Cpl. Dennis Nasis kag Police Staff Sergeant Frank Caballero.
Dugang pa ni Estrella, nakuha nila ang apat ka mga assault rifle kag ammunition kag isa ka .45 caliber pistol.
Samtang ginbisita ni Police Brigadier General Sidney Villaflor, Regional Director sang Police Regional Office 6 ang mga biktima sang Calatrava encounter lakip na ang napatay nga pulis.
Sang Sabado nagbisita si Villaflor sa haya ni Police Cpl Jaime Nuñez, sa Cadiz City kag nag-award sang Medalya ng Kadakilaan. Naghatag man ini sang inisyal nga P100,000 nga cash assistance sa nabilin nga himata ni Nuñez nga napatay sa police operation sa Calatrava sang nagligad nga semana.
Ginbisitahan man sang Regional Director si Police Cpl Dennis Nacis, nga Wounded-in-Police-Operation sang Calatrava Municipal Police Station nga na-confine karon sa isa ka pribado nga ospital sa Bacolod City.
Gin hatagan man sang Medalya ng Sugatang Magiting si Nacis kasubong man initial cash assistance nga P50,000.