Amo sini masami ang sitwasyon kada aga sa gwa sang Negros Occidental Police Provincial Office headquarters sa Burgos Extension. May mga salakyan nga naga parking sa pihak kag pihak kilid sang highway nga isa ka traffic violation.
Kun peak hours naga lab-ot sa ospital ang pilahay sang mga salakyan.
Suno kay NOCPPO spokesperson, Police Lt Judesses Catalogo, nagmando na ang deputy for operation sang NOCPPO nga usisaon kun sin-o ang mga tag iya sang naga parking nga salakyan kag kun may yara sang mga pulis nga naga park, sila ang pang sawayon bangud indi dapat nga parkingan ang kilid sang highway.
Kun padayon pa suno kay Catalogo ang pagpark sang mga pulis sa highway, sila ang makig angut na sa BTAO kag TMU agud nga ma isyuhan sang ticket ang ini nga mga pulis.
Madako man ang parking area sa sulod sang headquarters suno kay Catalogo gani wala sang rason ngaa sa gwa ma parking ang mga pulis.
Pila sa mga naga park sa gwa ang mga sibiliyan man suno kay Catalogo nga naga proseso sa sulod sang NOCPPO gani ila man ini nga warningan kag sila ang makig angut man sa BTAO agud ma butangan sang traffic enforcer kun kinahanglan.