NOCPPO gintugyan na sa COMELEC ang desisyon kun iga-suspend ang ginapatuman nga Armas Baylo Bugas kabahin sang kampanya batuk sa loose firearms.
Kabaylo sang 903 ka mga pusil nga na-surrender sa Negros Occidental Police Provincial Office sang 2024 ang sinako nga bugas nga napanagtag sa mga nag-surrender sang armas sa pila ka mga police stations sa probinsya.
Ginpahayag ni NOCPPO Spokesperson Police Captain Judesses Catalogo nga nangin isa ini sa ila masupog nga kampanya agud nga mapasiguro ang malinong nga May 2025 elections.
Pero kun tuyo sang Commission on Elections nga ipa-suspend ang initiative sang provincial PNP kasubong sang ginapatuman nga Oplan Katok, maga-sunod lamang ang NOCPPO sa mangin mando sang ahensya.
Nanindugan si Catalogo nga nagapabilin nga neutral ang kapulisan sa probinsya sa pagsugod sang kampanya kag nagapati siya nga indi makatuga sang disbentaha ang ginahimo nila nga tikang para ma-surrender sang mga gunholders ang kutob sa mga pusil nga wala sang lisensya.
Ginklaro sang pamunuan sang Comelec nga wala sila nagapamatok sa tikang sang kapulisan, pero nagakinahanglan lang sang safeguard ukon pagsulundan bahin sa pagpatuman sini agud indi makatuga sang intimidasyon sa mga naga kandidato kag sa ila mga suporters karon nga nagahilapit ang pinili-ay.