Ginlunsar sang lokal nga panguluhan sang Bacolod City ang programa nga “No Plastic Thursdays” sa pila ka mga merkado sa siudad.
Suno kay Councilor Celia Flor, kada adlaw sang Huwebes, ginaduso nga ang mga konsumedor magdala sang ila kaugalingon nga suludlan, pareho sang eco bags, basket, ukon reusable containers.
Ini bangud indi na pag-itugot ang pag gamit sang plastic kada Huwebes.
Ginpa-athag pa ni Flor nga kon may dala man nga plastic ang konsumidor, dapat personal ina nila nga pagagamiton. Ginadumilian na ang paghatag sang plastic bags gikan sa mga vendors kada Huwebes.
Dugang pa ni Flor, ini nga programa panugod pa lang.
Target sang LGU nga maanad ang mga pumuluyo sa bag-o nga sistema agud nga mahimo pa madugangan ang “No Plastic Days”.
Ginalauman man nga igalunsar ang amo nga programa sa iban pa nga merkado sa siudad sa masunod nga mga semana.