Pagpatuman sang “no parking” sa Lacson Street kag paghatag solusyon sa problema sa traffic lights mangin prayoridad ni Councilor Dindo Ramos sa pagbalik sa konseho.
Na-repair na ang traffic light sa intersection sang dalan Burgos kag Circumferential road ukon Lopue’s East area nga isa sa gintagaan prayoridad ni Mayor Greg Gasataya.
Ang pag kaayo kag pag-ilis sang mga traffic lights ang kabahin sa luyag tagaan man sang atensyon ni Councilor Dindo Ramos sa iya pagbalik sa konseho para pamunuan ang Committee on Transportation and Traffic.
Nalakip diri ang pagpatuman sang towing ordinance ilabi na ang pag-identify sang tow away zones kasubong sang regulated zone nga may oras lang nga pwede maka-park ang salakyan kag ang mga absolute tow away areas nga ginadumilian ang parking.
Ang Lacson Street ang nagapanguna nga tagaan pagtamod sang alkalde agud nga mapahagan-hagan ang pag-gutok sang lakat sang trapiko ilabi na kun peak hours.
Igaduso man ni Ramos ang pag-maximize sang pag-gamit sang Bacolod Negros Occidental Economic Highway ukon BANOCEH para mabuhinan ang pag-ginutok sang mga salakyan kag truck sa Circumferential road.
Handa ang konsehal nga tagaan atensyon ang problema sang mga drivers kag operators sang depasahero nga mga salakyan nga apektado sang ginapatuman nga public utility vehicle modernization program.
Samtang nalakip sa iya pamunuan nga komitiba sa konseho ang Urban Poor, Housing and Resettlement.