Ang Negros Island Region ang isa sa mga gina lantaw nga mangin sentro sang economic growth sa Visayas suno sa kay Presidente Ferdinand Marcos, Jr. Subong nga hapon opsiyal nga nga nangin isa ka layi ang Negros Island Region matapos niya ini nga pirmahan.
Para sa presidente praktikal lang gid nga ipaidalom sa isa ka rehiyon ang Negros Occidental, Negros Oriental kag Siquijor.
Sa isa lang ka isla naga puyo ang mga pumuluyo pero napaidalom sila separado nga mga administrative regions.
Dinekada na ang mga taga Occidental nga kinahanglan pa magtabok sa Iloilo kun may i-proseso sa mga regional offices kag ang mga taga Oriental kag Siquijor naman naga tabok pa Cebu.
Antes sang pagpirma sang NIR Act, ang Negros Occidental ang kabahin sang Region 6 kag parte naman sang Region 7 ang Negros Oriental kag Siquijor.
Suno sa presidente, ini ang maga unify ukon maga isa sang tatlo ka mga probinsya.
Ginalantaw sang presidente nga ang Negros Island Region mangin sentro sang development sa Visayas.
Ginapaabot niya nga maga binuligay ang tatlo ka mga probinsya para mapabakod ang ini nga rehiyon.
Para naman sa Negrense nga senador nga si Juan Miguel Zubiri, ang Negros Island Region ang maga tib-ong sang ekonomiya sang Negros Oriental, Negros Occidental, kag Siquijor karon nga napaidalom na ini sa isa ka rehiyon.
Magadala man ini sang dugang nga mga investment kag trabaho sa tatlo ka mga probinsya.
Sini nga hapon gin pirmahan sang presidente ang NIR Act. Ginsaksihan ini sang mga lokal nga mga opsiyales gikan sa tatlo man ka mga probinsya pati na sang tiglawas gikan sa nagkalain lain nga mga sector.