Gin-aprubahan sang House of Representatives sa third kag final reading ang hagna nga naga tukod sang Negros Island Region.
Ang House Bill 7355 ang nakakuha sang 290 ka boto nga yes kon diin tuyo isahon ang Negros Oriental, Negros Occidental kag Siquijor kag kilalahon nga Negros Island Region.
May itukod nga Technical Working Group para sa bag-o nga rehiyon kon diin may tiglawas gikan sa Office of the President, Department of Budget and Management, Department of the Interior and Local Government, tiglawas gikan sa Office of the Governor sang mga probinsya sang Negros Oriental, Occidental kag Siquijor kag tanan nga elected District Representatives sa tanan nga probinsya lakip na ang tiglawas gikan sa syudad sang Bacolod.
Nasaad sa hagna nga ang TWG ang magahimo sang strategic plans para sa institutional arrangements sang NIR, i-rekomenda sa Office of the President ang ginpili nga lokasyon para sa Regional Center, kay-uhon ang organizational development, staffing kag budgeting sang regional line kag regulatory agencies pati ang development planning kag investment programming.
Sa karon, ang Negros Occidental kag capital sini nga Bacolod City ang yara sa Western Visayas ukon Region 6 samtang ang Negros Oriental kag Siquijor ang kabahin sang Central Visayas sa Region 7.
Ang authors sang hagna amo sanday Negros Occidental Representatives Juliet Marie de Leon Ferrer, Alfredo Marañon, III, Gerardo Valmayor, Jr., Emilio Bernardino Yulo, Mercedes Alvarez kag Jose Francisco Benitez; Greg Gasataya sg syudad sang Bacolod kag Joseph Stephen Paduano sg Abang Lingkod Partylist.
Gintukod sadto ang NIR base sa Executive Order 183 ni anay Presidente Benigno Aquino, III sadtong Mayo 29, 2015 apang gin-abolish ini ni Presidente Rodrigo Duterte matapos nag isyu sang Executive Order 38 sadtong Agosto 7, 2017.