Kalabanan sa mga transient vendors, ilabi na ang wala matagaan sang pwesto sa Libertad Public Market ang apektado man karon sang nagapadayon nga road repair sa dalan Amelia sa Bacolod.
Gani kagab-i temporaryo anay nga ginpahanugutan sang Local Market Committee nga makabaligya sa Night Market ang masobra 30 ka market vendors sa na-semento na nga bahin sang dalan Amelia.
Suno kay Tess Robles, ang market supervisor sang Libertad Public Market, pinaagi sa natukod nga Night Market Ordinance tagaan sang opportunidad ang masobra sa 200 pa ka mga vendors nga makabaligya humalin las sais sang gab-i tubtob las 5 sang kaagahon.
Ang dalan Mercedes nga yara lang sa kilid sang merkado ang kabahin sa mga lugar nga italana para sa Night Market.
Sa record sang komitiba, nagalab-ot sa 3,544 ang mga recognized vendors sa siudad pero may masobra 830 sa ila ang wala sang pwesto sa merkado rason nga sila ang mangin prayoridad sa ginasuguran nga Night Market.