Humalin sang Martes nga adlaw, nagpagwa sang Yellow Alert advisory ang National Grid Corporation of the Philippines ukon NGCP sa Visayas.
Humalin la una sang hapon tubtob las nuebe sang gab-i ang Yellow Alert.
Yara sa 2,528MW ang available capacity sang Martes pero ang peak demand nagalab-ot sa 2,475MW.
Buot silingon, may nagakaigo pa nga power supply pero ang operating margin ukon ang sobra nga power supply ang tuman ka gamay nga kun may mag shutdown pa gid nga planta, magatuga na ini sang brownouts.
Ang rason, may 11 ka mga planta nga wala naga andar humalin pa sang Abril kag may anum naman ka mga power plants ang wala naga gana humalin pa sang 2023.
Kaina sang aga liwat naman nga nagpagwa sang advisory ang NGCP nga Yellow alert para sa 3pm-4pm kag 5pm-7pm pero las dos sang hapon nag anunsyo ang NGCP nga lifted na ang yellow alert ukon may nagakaigo na nga power supply.
Sang peak sang summer sang 2024 naglab-ot sa red alert ang Visayas nga nag resulta sa bulos-bulos nga mga brownouts.
