Underground cabling system ginasuguran na sang Negros Power sa Lacson Street, clearing sang mga linya sang kuryente kag poste suguran sa Agosto.
Humalin sang Abril ginsuguran na sang Negros Power ang boring operation ukon ang pagbuho sa area sang Lacson Street halin Capitol Lagoon asta sa BS Aquino Drive.
Kabahin ini sang Phase 1 sang ginapatuman nga underground cabling system project.
Ginasuguran pati ang pag-obra sang mga pre-cast manhole nga ibutang sa mga ginkutkot nga portion sang dalan.
Ginsiling ni Negros Power President kag CEO Roel Castro nga mahimo sa Agosto tubtob Setyembre masuguran na ang clearing operation halin sa pagkakas sang mga linya sang kuryente kag pagkakas sang mga poste sa kilid sang dalan Lacson.
Ginatan-aw nga sa Disyembre matapos na ang underground cabling system nga paga-gamiton pati sang mga telecommunication company.
May P79M ang gintalana nga pondo sang Negros Power para sa amo nga proyekto.
Ang underground cabling system ang kabahin sa mga priority projects ni anay mayor kag karon Congressman Albee Benitez sa tuyo nga malubad ang problema sa spaghetti wires ukon ang mga nagalaylay nga kable sang kuryente sa siudad.