Ang provincial government sang Negros Oriental ang nagapangita sa karon sang pamaagi para ma accommodate ang mga pasyente sa Negros Oriental Provincial Hospital kasunod sang pagsaka sa kadamuon sang pasyente kun sa diin isa sa kabangdanan ang pagdamo sang kaso sang dengue.
Ginsiling ni Dr. Liland Estacion, Integrated Provincial Health Office (IPHO) chief, sa interview sa katapo sang media sang Hwebes nga ang Department of Health-accredited number of beds sa NOPH 250 lamang.
Pero karon suno sa iya may yara sang 600 ka pasyente sa NOPH.
May mga 80 pa gid ka dugang nga pasyente sa emergency room.
Paathag ni Estacion may mga pasyente nga may yara sang dengue symptoms kag temprano nga nagapa konsulta kag luyag gilayon nga mag pa admit.
Dugang pa diri may mga pasyente nga gikan sa kaiping nga lugar kaangay sang Siquijor para man mag pabulong sa lain naman nga mga masakit nga gina batyag.
Gina accommodate sang NOPH ang mga nagapadulong sa ila bisan pa limitado ang ila bed capacity bangud indi man sila makapamalibad sa pasyente base sa gina mando sa laye.
Suno kay Estacion isa sa pamaagi nga ma decongest amo kuntani ang pag review sang referral system.
Personal naman liwat nga nagbisita sa NOPH si Governnor Manuel “Chaco” Sagarbarria sang Hwebes agudto ma assess man ang sitwasyon.
Nagsugilanon si Governor Sagarbarria sa mga medical professionals kag administrative staff kun sa diin gintalakay ang resource allocation, patient care strategies kag community outreach efforts nga naga tuyo sa pagpahagan-hagan sang paglapta sang dengue.