Ginkakas na sa pwesto ang Provincial Director sang Negros Oriental Police Provincial Office nga si Police Col. Alex Recinto.
Sa turn-over ceremony nga ginpatigayon sang Sabado sa headquarters sang NORPPO sa banwa sang Sibulan, ginsiling ni Police Regional Office-7 Director Brigadier General Anthony Aberin nga normal lamang ang ini nga proseso sa bahin sang mga pulis kag ang pagsaylo sa iban nga unit.
Acting Provincial Director sang NORPPO amo na si Police Colonel Ronan Claravall.
Kadungan sa pagkakas kay Recinto sa pwesto, ang pagbisita ni Department of the Interior and Local Government Secretary Benhur Abalos sa NORPPO.
Si Recinto ang nagpungko bilang NORPPO Director sang Marso 22, 2023 kag masobra pa lamang tatlo ka bulan nga nagpangalagad sa probinsya.
Si Recinto ang ginbulos kay NORPPO Col. Reynaldo Lizardo matapos ang natabo nga pagpatay kay anay Negros Oriental Governor Roel Degamo sang Marso 4 sa banwa sang Pamplona.
Suno kay Aberin, may unit na nga sayluhan si Recinto kun sa diin siya mas makabulig sang husto ilabi na nga siya isa ka abogado.