Bacolod LGU plano nga ipatuman ang inspection sa points of entry kabahin sa tikang batuk sa Mpox. Samtang, Negros Oriental ang nagtuga sang task force.
Paagi sa gin-issue nga executive order ni Negros Oriental Governor Manuel Sagarbarria nagporma na sang Mpox Task Force ang probinsya sa tuyo nga mapunggan kag ma-control ang paglapta sang makalalaton nga balatian.
Nag saka na sa apat ang kumpirmado nga kaso sang Mpox sa Iloilo City kag may duha naman ka suspected cases.
Sang nagligad pa nga semana sang ginduso ni sadto Acting Mayor El Cid Familiaran ang pagtukod sang task force sa pagsinapol upod sa mga city department heads kag City Health Office. Pero wala anay ini gin-recommend sang CHO.
Ginpahayag ni Mayor Albee Benitez nga bisan indi pa man ginakinahanglan, ginmando niya sa City Health Office ang pagpatuman sang inspection kag monitoring sa mga points of entry kasubong sa sea port kag airport.
Gindugang sang alkalde nga indi na kinahanglan pa nga maghulat sa mangin rekomendasyon sang Department of Health agud mas mapabaskog ang tikang kontra Mpox.
Ginapaabot sang alkalde ang pagtalana sang personnel kag equipment kasubong sang scanners nga sarang makabulig sa monitoring.
Pabaskugon man sang siudad ang information dissemination para mapaiway ang posible nga paglapta sang balatian.