Negros Oriental Chamber of Commerce and Industry nagpagwa sang statement of support para sa Negros Island Region. Ila man nga gin kwestyon kun ngaa subong lang nagpamalabag ang Diocese of Dumaguete kun sa diin pilirmahan na sang presidente nga mangin isa ka layi ang Negros Island Region Bill.
Sa ila sulat para sa kay Presidente Ferdinand Marcos, Jr., ginsiling sang grupo sang mga negosyante nga malipayon ang business community sang Negros Oriental sa nangin proklamasyon sang presidente nga iya na pirmahan para mangin isa ka layi ang NIR Bill.
Nagpabutyag sang pagka dismaya ang grupo sa nangin statement sang Diocese of Dumaguete nga naga kontra sa pag isa sang Negros Occidental, Negros Oriental kag Siquijor. Gani gin isa-isa sang mga negosyante ang mga rason kun ngaa suportado nila ang NIR Bill kag ila gin sabat ang tanan nga isyu nga gin saysay sang simbahan Katoliko kuno ngaa naga pamalabag sila sa NIR Bill.
Misleading suno sa grupo ang gina siling sang diocese nga kulang sa impormasyon ang mga pumuluyo sa Negros Oriental kay man pila ka bulan antes nga gin aprubahan sadto ni Presidente Noynoy Aquino ang executive order nga naga tukod sang NIR, pila na ka mga konsultasyon ang ginpatigayon sa Negros Oriental.
Sa alegasyon naman nga wala nasunod ang due process, suno sa mga negosyante, ang mga pumuluyo ang gin tiglawas sang kongresista sang probinsya nga amo ang nagduso sa paghimo sang sini nga bill.
Tuhoy naman sa 2014 nga survey sang Silliman University nga kadam-an sa mga taga Negros Oriental wala naga pabor sa NIR, suno sa grupo, ang survey ang ginpatigayon para mahibaluan kun bala kinahanglan pa nga mag public consultation sa sulod sang lima ka bulan kag bangud may masobra pa sa 30% nga undecided, ginpatigayon ang consultation. Pagkatapos sang consultation kalabanan nag pabor na sa NIR gani gin pirmahan ni PNOY ang executive order number 183 nga naga tukod sang Negros Island Region.
Nagapati man sila nga ang lain nga kultura kag linguahe indi mangin upang sa pag isa sang duha ka mga probinsya kay ang tagsa ka probinsya gani ang may nagkalain-lain nga grupo kag linguahe. Amo man sini ang sitwasyon sa iban nga mga rehiyon.
Pila lamang ini sa mga punto nga gin isa isa sang mga negosyante. Gina pangabay nila ang presidente nga indi pag sapakon kag pirmahan nga mangin isa na ka layi ang NIR Bill kag ang mga negosyante sa Negros Oriental ang maga padayon sa pag suporta sa mga programa sang Marcos administration.
Kag may isa ka pamangkot ang Negros Oriental Chamber of Commerce and Industry sa Diocese of Dumaguete nga wala pa nila masabat tubtob subong.
Ano ang disbentaha sa pagbukas sang 16 ka bag-o nga regional offices sa Dumaguete City sa idalom sang NIR kun ikumpara sa ZERO regional office subong nga ang Negros Oriental ang yara sa idalom sang Region 7 suno sa ila.