Humalin Enero tubtob Setyembre sini nga tuig, may 172 ka HIV cases nga na record ang Negros Occidental. 101 naman ang sa Bacolod City. Kag suno sa Provincial Health Office padayon ang pagsaka sang kaso kag maka alarma.
Humalin sang 1986 naman may 1,176 ka HIV cases ang probinsya, ikatlo sa pinaka maatas sa Western Visayas. Naga panguna ang Iloilo Province nga may 1,410 nga na record nga HIV cases.
Pero, suno kay Edjohn Javellana ang HIV/AIDS coordinator gina project nila nga mga 1,900 ang kadamuon sang HIV cases probinsya kag isa ka pagpanghangkat ang pag pangita sang mga 800 ka iban pa. Indi ma negar suno kay Arnulfo Makilan nga Focal Person para sa HIV/AIDS gikan sa isa ka NGO nga may mga naga pa test pero wala naga balik matapos nga mag positibo. Rason nga gina hinyo ang bulig sang LGU bahin diri.
Suno kay Dr Ernell Tumimbang karon nga gina saulog ang World AIDS Day ang pagsaka sa kadamuon sang HIV cases bunga man sang kampanya nila labi na sa gina kabig nga high risk groups nga mag paidalom sa testing. Ginaduso karon ang community based screening.
Importante ang early detection suno sa iya.
“I think the message that we want to send is that you should test for your protection…Early detection is the key, that’s why we don’t focus our testing sa mga facilities lang. We go beyond our facilities”, suno kay Tumimbang.
Sa datus, halos 50 porsiento sa HIV cases ang yara sa 25 to 34 years old nga age category. Naga sunod naman ang 15 to 24 years old nga age category.
“Subong naga focus kami not only sa LGBTQ, ara naman kita subong sa aton nga mga youth, especially sa aton nga mga Senior High School tungod nga ang kaso sang aton nga HIV yara sa mga younger generation”, suno kay Makilan.
Suno kay Josephine Nonato, ang HIV/AIDS Coordinator, ini bangud sang behavior dala naman sang impluwensya sang social media sa amo nga mga pang edaron. 115 naman sa 2022 nga mga HIV cases ang na transmit paagi sa pag pakighilwas sang lalaki sa lalaki.
“Kun may ara ka HIV and you’re undergoing treatment ang viral load mo manaog man na siya… That means you can go to your family members, you can do what you want. Ang point is you should undergo treatment to really be a responsible member of the society. It’s not the end of the world”, suno kay Tumimbang.