Sa mga interesado nga mag eskwela sa Northern Territory sa Australia nga may sarang mag gasto para sa ila nga kaugalingon, maga pain sang slot ang probinsya.
Ini suno kay Negros Occidental Governor Eugenio Jose Lacson nga nag siling man nga ang panguna nila nga tinutuyo sa ila nga pag lakat sa Darwin sa Northern Territory amo ang pag pakig kita sa mga scholars sang probinsya lakip na ang mga nag graduate na kag naga trabaho na didto.
Suno kay Lacson, may 30 ka mga scholars kag mga graduates ang ila nga nasapol kag kadam-an sa ila ang luyag na nga didto na mag trabaho kag magpangabuhi bangud sang mga kahigayunan nga ila man nakit-an.
Suno sa gobernador kay limitado man lamang ang ma accommodate sang study now pay later nga scholarship program sang probinsya sa Darwin, maga bukas sila sang mga slot para man sa yadtong mga interesado nga mag eskwela pero may sarang nga mag gasto para sa ila nga kaugalingon.
Suno kay Lacson sila ang pagahatagan sang assistance sang probinsya sa ila nga application. Sa ila nga pagbisita sa Darwin, Northern Territory sang nag ligad nga semana, naglagda ang probinsya sa pag panguna sang gobernador sang MOA para sa dugang nga mga scholars sang probinsya sa idalom sang Study Now Pay Later program.
Gina paabot ang dugang nga 15 ka mga scholars sa 2023.