Makita sa video ang nagatinumpok nga mga patay nga inug-bulang nga manok.
Ini ang kuha sang kapulisan matapos nga matukiban, kahapon nga adlaw, Hulyo 8, ang isa ka iligal nga online sabong operation sa Hacienda Pilar, Barangay Alicante, EB Magalona samtang nagapatigayon ini sang manhunt operation.
Ginsiling ni Police Regional Office Negros Island Region Director Police Brigader General Romano Cardiño, nga tuyo lang kuntani sang kapulisan nga mag serve sang warrant of arrest sa isa ka Most Wanted Person sa rehiyon, apang pag-abot sang otoridad sa lugar, ila nadakpan ang nagapadayon nga operasyon sang iligal nga e-sabong.
Ginkumpirmar man ni Cardiño nga nakit-an sang otoridad si Negros Occidental Board Member Andrew Montelibano nga yara sa sulod sang isa ka compound kun sa diin nahamtang ang e-sabong.
Apat ka persona ang arestado matapos nga nadakpan ini sa akto nga naga operate sang nasambit nga aktibidad. Sila ang ginapatihan man nga may kaangtanan kay Montelibano.
Magapangatubang sa kaso nga paglapas sa Presidential Decree 1602, illegal gambling, kag Cyber Crime Prevention Act ang mga suspetsado.
Samtang ang subject kuntani sang manhunt operation ang nakapalagyo kag wala pa madakpan sang otoridad.
Wala man naaresto si Board Member Montelibano sa ginpatigayon nga operasyon bangud suno sa kapulisan, wala siya nakit-an sa akto nga pagpakigpabahin sa e-sabong.
Ginakabig sang kapulisan nga person of interest si Montelibano bangud ginapatihan man nga siya ang tag-iya sang amo nga lugar. Apang ginklaro ni Cardiño nga wala pa mapamatud-an kon si Montelibano gid man ang sa likod sang iligal nga operasyon.
Padayon pa nga gina-imbestigaran sang kapulisan ang kahilabtanan ni Montelibano sa iligal nga e-sabong sa EB Magalona.
Si Montelibano ang pamuno sang Committe on Games and Amusement sang Sanguniang Panlalawigan sang Negros Occidental.
Gintinguhaan sang Digicast Negros nga makuha ang bahin ni Montelibano apang wala pa siya nagasabat sa iya nga telepono kag wala man siya kaina sa iya nga talatapan sa Kapitolyo.
Nakuha sa operasyon ang 142 ka mga buhi nga manok, 1,016 ka mga patay nga manok, 156 ka bulang, kag mga equipment nga ginagamit sa online operation.
Ginapasiguro naman sang kapulisan ang publiko nga wala sang “white washing” nga matabo kag wala sang bisan sin-o nga public official ang makaluwas sa layi.
[sibwp_form id=1]