Nagahatag sang maayo nga laragway kag ginalauman nga magaduso man sang dugang nga investment ang report sang COA nga ang Negros Occidental ika anum sa richest provinces sa pungsod.
Ini suno kay Negros Occidental Governor Eugenio Jose Lacson nga nag siling man nga sa iya impormasyon ang nangin basehan sang amo nga report amo ang assets sang probinsya. 18.025 billion pesos ang assets sang Negros Occidental sa COA report.
“I’m not sure really, if it’s just government side or as a whole, government and private sector. That’s why I said I don’t know what to make of it”, suno kay Lacson.
Mahimo nga may mga reports nga gin pa submit. Dependent sa National Tax Allotment ukon NTA ang Negros Occidental suno kay Lacson. Pero ang kasubong nga report mahimo maga pabaskog sang pagsalig nga sarang mag invest sa Negros Occidental, pero suno kay Lacson may iban pa man nga dugang nga basehan para diri kasubong sang peace and order situation sang lugar.
“It gives a good picture that Negros Occidental is in the top 6. It gives us a good impression, hopefully that will bolster more investments, locally or outside investors”, suno kay Lacson.
Nagapabilin ang Cebu bilang richest province sang pungsod nga may 215.27 billion pesos nga assets.
Ang amo nga datus nalakip sa 2021 Annual Financial Report for Local Government sang COA sandig sa mandato sang Constitution and the Government Auditing Code of the Philippines.
Yara sa report ang financial statements sang 1,676 ukon 97.7 percent sang 1,715 local government units, nga naga lakip sang 81 provinces, 1,488 municipalities kag ang Bangsamoro government.