Ginbawian sang kabuhi ang 21-anyos nga volleyball player sang Alas Pilipinas Men nga si Ike Andrew Barilea sa nagluntad nga vehicular incident sa atubang sang isa ka mall sa Villena Street sa Barangay Zone 2, Cadiz City, Martes sang hapon.
Imbulbado sa traffic incident ang Yamaha Sniper nga ginadala ni Barilea kag isa ka Ceres bus.
Nag-gwa sa imbestigasyon nga pareho nagapadulong sa Cadiz proper ang motor kag ang bus, apang nag-signal pawala si Barilea.
Nabungguan sang bus kag nalapakan ang motorsiklo sang volleyball player, nga residente sang nasambit nga barangay.
Nakaangkon sang madamo nga pilas sa ulo kag lawas si Barilea. Gindala ini sa Cadiz City Emergency Clinic.
Gin-alegar nga na-miscalculate sang driver sang bus ang iya pag maneuver kag na-iguan ang motor.
Ang 44 anyos nga driver nga residente sang Brgy. Singcang-Airport sa Bacolod City, detained karon sa Cadiz PNP.
Sa pahayag sang Alas Pilipinas, ila nga ginakasubo ang pagtaliwan ni Barilea.*