Negosyante nga isa man ka contractor patay sa pagpaniro sa Bacolod City Martes sang aga.
Magabukas kuntani ang negosyante sang iya hardware sa may Bonifacio Street, sa kilid sang Bacolod Central Market sang siya ang gintiro sang gunman, pasado las 7 kaina sang aga.
Nag-agum sang igo sang bala sa likod sang iya ulo ang 52-anyos nga biktima nga ginkilala kay Romy Li, tag-iya sang Bacolod Republic Hardware Inc. kag sa impormasyon nga kuha sang PNP, isa man siya ka contractor.
Ginhingagaw pa dalagan sang mga tawo ang salakyan agud makuha kuntani ang plate number apang wala sang plaka ang getaway vehicle nga isa ka SUV.
Suno kay Police Captain Francis Depasucat, hepe sang Bacolod Station 1, gindala ang biktima sa Riverside Medical Center apang ini ang ginbawian sang kabuhi.
Nag-request na sang CCTV footages ang kapulisan sa mga katupad nga establisiyemento apang suno kay Depasucat, kalabanan ang guba ukon wala gid sang na-install nga CCTV.
Apang sa inisyal nga imbestigasyon, nakasuksok sang kalo kag jacket ang mga suspek, nga posible madugay na nga nagabantay sa rota sang negosyante.
Mga masobra isa na ka dekada ang negosyo sang biktima nga isa ka contractor supplier, suno sa pulis.
Ginsiling pa ni Depasucat nga nagatalikod sa gunman ang biktima sang siya ang gintiro.
Si Li ang ikaduha na nga contractor nga gintiro sa Negros humalin Agosto.
Duha ka mga lupok ang nabati-an sang mga nakasaksi antes natumba ang biktima.