Shadow

Negosyante kag anay cameraman sang ABS-CBN Bacolod patay sa aksidente

BY MARTIAN MUYCO

BCPO photo

Gindeklarar sang PNP nga dead on the spot ang tatlo ka mga persona nga nagasakay sa Mustang matapos magsuhot sa idalum sang truck na
nga may karga sang tubo sa Circumferential Road, Barangay Villamonte, Bacolod City mga ala una kaina sang kaagahon.

Nagamaneho sang salakyan ang 40 anyos nga si Stanley Flores nga tag-iya sang isa ka restaurant sa siudad kag kaupod niya sa salakyan si Wilton Porcel, 42 anyos, kag anay cameraman sang ABS-CBN Bacolod kag iya 19 anyos nga hinablos nga si Mark Wiljohn Porcel.

Suno sa suod nga abyan ni Porcel, gikan sila sa isa ka birthday party kag idul-ong kuntani pauli ni Flores si Porcel kag ang iya hinablos sa Barangay Banago.

Base sa report sang traffic investigator sang Police Station 4, nakabunggo ang salakyan ni Flores sa ginasundan nga 10 wheeler nga ginamaneho ni Michael Mejica.

Bangud sang kakusog sang pagkabunggo, nagsuhot ang awto sa idalum sang pangulihi nga bahin sang truck.

Detained sa karon sa Police Station 4 si Mejica.

Ginsiling ni Mejica nga nakibot na lamang sya nga may naglagabong sa likod sang iya nga salakyan.

Secured By miniOrangeSecured By miniOrange