Humalin pa sang nagligad nga semana nag bukas ang probinsya sang Negros Occidental sa idalom sang Public Employment Service Office sang help desk para sa mga Negrense sa Lebanon nga luyag magpauli bangud sang nagasaka nga tension sa pungsod.
Suno kay Karen Dinsay ang PESO Manager, sa listahan nga gin hatag sang Overseas Workers Wefare Administration sa ila, may 398 ka mga overseas Filipino Workers gikan sa probinsya ang yara sa Lebanon.
Nalakip na diri ang 61 nga gikan sa Bacolod City.
Pero suno kay Dinsay, tubtob sa karon wala pa man sang himata sang OFW nga nag palapit sa ila nga talatapan.
Suno kay Governor Eugenio Jose Lacson daw wala pa sang luyag nga magpauli.
Ang national government damlag pa ang nag sugod sang repatriation efforts ukon ang pagpabalik sa mga OFW sa pungsod sa tunga sang tension.
Pero base man sa national news, apesar sang sitwasyon may pagpangduha-duha sa bahin sang pila ka mga OFW sa pagpauli angut man sa ila mangin palangabuhian.
Suno kay Dinsay, kun may mag pangayo bulig, personal nga mag padulong ang himata sang OFW sa ila nga talatapan nga nahamtang man sa Kapitolyo Probinsyal.
5,000 pesos nga assistance kag sa ulihi psychosocial counseling ang mahatag sang probinsya.
Samtang, pwede man derecho na mag padulong sa OWWA para mag hinyo sang assistance sa luyag magbalik sa pungsod.
Ang panawagan sa pagpauli kasunod man sang pagkusog sang konplikto sa tunga sang Hezbollah kag Israeli forces.