Masobra sa 2,600 ka pamilya gikan sa lima ka mga banwa kag siudad sang Negros Occidental ang apektado sang paglupok sang bulkan Kanlaon. Negros Occidental ang gina paabot magdeklara sang State of Calamity sini nga semana.
As of 11 am, 2,697 ka pamilya ukon 9,086 ka individuals ang gin-evacuate bangud sang paglupok sang bulkan Kanlaon.
Ini sila ang gikan sa walo ka mga barangay sa La Castellana nga nag dangat sa 2,199 ka pamilya, isa ka barangay sa Moises Padilla, duha sa Bago, duha man sa Pontevedra kag duha ka barangay sa La Carlota City.
Yara sa red alert status ang Office of the Civil Defense lakip na ang mga Provincial, City kag Municipal Disaster Risk Reduction Management Council.
Suno kay Office of the Civil Defense – Negros Island Region Head, Donato Sermeno, humalin pa kahapon ginapatuman ang forced evacuation sakop sang 6 kilometer radius sang bulkan matapos nga gin pasaka ang alert level sini sa 3 kag naga padayon pa ang evacuation.
Suno sa OCD gina paabot nga maga dangat sa 87,000 ka pumuluyo ang ma apektuhan.
Ginsiling naman ni Negros Occidental Governor Eugenio Jose Lacson nga sa iya pag-istorya kag Defense Secretary Gilberto Teodoro, mahimo nga ang subong nga sitwasyon magalawig sang tatlo ka semana.
Ini kun wala sang may matabo nga liwat nga paglupok sang bulkan Kanlaon.
Kun may makit-an nga posibilidad nga maga lupok liwat ang Kanlaon, suno kay Lacson, mahimo nga ipatuman ang forced evacuation sakop sang 10 kilometer radius.
Si Raul Fernandez ang OCD Western Visayas head suno kay Lacson ang naka designate na nga magpamuno sang Task Force Kanlaon.
Ginsiling sang gobernador nga sa pag paidalom sa probinsya sa state of calamity sarang na nga magamit ang pondo sini.
May 78 million pesos nga pondo ang Negros Occidental para sa Quick Response Fund.
“I just talked to Sec. Teodoro, minimum daw this may take three weeks. Kung, mag kalma na si Kanlaon, otherwise kung makita nila nga may possibility nga may second eruption, they will already call for a 10km radius forced evacuation. This is now a serious matter and we’re hoping the LGU will cooperate and join in the forced evacuation if necessary up to 10 km”, suno kay Lacson.