Deliberation para sa 2025 budget sang Negros Occidental ang natalana nga magsugod. Target sa pagpasar sini sa Disyembre 3.
Suno kay Vice Governor Jeffrer Ferrer nabaton na sang iya nga talatapan ang schedule para sa budget hearing nga pamunuan ni Board Member Rommel Debulgado nga chairperson sang Committee on Finance sang Sangguniang Panlalawigan.
Sunod-sunod ang schedule sini sa nagkalain-lain nga mga departamento.
Kun kinahanglan gid man sang amendment, ini ang ipatuman suno sa bise gobernador.
Ginalantaw nila nga sa December 3 nga session sang Sangguniang Panlalawigan tigayon na aprobahan kag mapasar ang budget sang probinsya.
“May schedule to sa akon sang budget hearing kagapon lang gin hand-in. And then siguro by December 3 amo na na ang approval ta. But series ni siya ang aton budget hearings sa mga departments”, suno kay Ferrer.
6.4 billion pesos ang proposed 2025 budget sang Negros Occidental. 18.82 percent nga mas mataas ini kun ipaanggid sa 2024 budget.
6.2 billion pesos ang proposal para sa general fund proper kag 254.4 million pesos naman para sa Economic Enterprise Development Department ukon EEDD nga special account sa idalom sang general fund.