Sandig sa bacteriological examination, negative sa coliform kag E. Coli ang foreign object nga nakita sa arroz caldo nga ginpanagtag sa BCGC.
Ang Negros Prawn Producers Cooperative Analytical and Diagnostic Laboratory ang nagpatigayon sang test sa foreign object nga nakit-an sa arroz caldo nga ginkaon sang isa ka empleyado sang Business Permits and Licensing Office.
Suno kay City Administrator Mark Steven Mayo, nga si Councilor Wilson Gamboa Jr., ang nag-donate sang arroz caldo. Dugang pa niya, nga ang duha ka empleyado ang nag saysay nga sang ila gin pisga ang itom nga bagay nga nakit-an sa arroz caldo, nag baho ini.
Ugaling indi matumod kun ano ang nasapwan nga foreign object kag nangin negatibo ang resulta sa total Coliform kag E. Coli test.
Sa statement ni Gamboa iya ginsiling nga ang paghanda kag pag panagtag sang Arroz Caldo ang madugay na niya nga ginahimo antes pa man siya magsulod sa pulitika. Ang Arroz Caldo ang iya boluntaryo nga ginahatag para sa mga tawo nga naga proseso sang business permit pati na sa mga empleyado.*