Nagapabilin nga ASF free ang Negros Occidental. Ini sa tunga sang pag kapatay sang masobra sa 2,000 ka mga baboy gikan sa napulo ka mga banwa kag siudad sa probinsya. Incident Management Team nga maga tutok sa swine disease ang paga pormahon.
Nag patawag sang emergency meeting si Governor Eugenio Jose Lacson kaina sang aga nga gintambungan sang pila ka mga alkalde sa probinsya para matalakay ang sa karon 2,421 ka ginreport nga napatay nga mga baboy.
Sa 27 ka mga sample nga ginpadala sang Negros Occidental sa Region para ma examine, 18 diri ang negatibo sa African Swine Fever, gina hulat pa ang resulta sang nabilin.
Naga pabilin man nga negatibo sa ASF wala man gina dula sang probinsya ang posibilidad sang pag igo sang ASF rason nga gina plastar na ang mga tikang paaigi sa iga porma nga Incident Management Team nga amo ang maga tutok sa mga swine diseases.
May recorded hog deaths sa Manapla, EB Magalona, Silay City, San Enrique, Valladolid, Pulupandan, La Carlota City, Bago City, Pontevedra kag Hinigaran sa datus sang Provincial Veterinary Office.
Ang siudad sang Bago ang may pinaka madamo na report napatay nga baboy – 755.
Suno naman kay San Enrique Mayor, Jilson Tubillara, kada adlaw may naga kapatay nga baboy sa ila nga banwa kag bilog nga napulo ka barangay sa ila ang apektado.
Suno kay Tubillara gina backhoe na gani ang pagpalubong sa mga baboy.
Humalin Abril may 726 na nga na record napatay.
Isa sa mga tikang nga ipatuman amo ang border control sa tagsa ka banwa kag siudad. Mansig monitor kag pangapin ang kada banwa kag siudad.
Gina lantaw man ang pag cordone sa tagsa ka LGU, kun sa diin ang kada lgu amo na mismo ang maga supply sang kaugalingon sini nga pork requirement.
Gina haylo man nga likawan na ang pag re-populate.
Indi man malayo nga mapatay ang negosyo pero ginalantaw ini nga tikang para matapna ang masakit.