May dugang nga duha ka confirmed cholera death sa Negros Occidental. Samtang, suspected leptospirosis cases naman ang nadugangan sang apat.
Sa datus sang Provincial Health Office, humalin Enero tubtob Agosto 12 sini nga tuig, anum na ang confirmed cholera deaths sa Negros Occidental.
Napulo naman sa kabilugan ang confirmed cholera cases gikan sa probinsya. Ang San Carlos City ang may pinaka mataas nga na record cholera cases – 7 ang recorded cases, kag tig-isa naman gikan sa Silay, EB Magalona kag Talisay City.
50 naman ang suspected cholera cases. Padayon ang pag abiso sa mga pumuluyo nga ipasiguro nga matinlo ang pagkaon kag gina inom nga tubig. Mas maayo kun napabukalan ang gina inom nga tubig.
Sa pihak nga bahin, 101 ang suspected leptospirosis cases sa Negros Occidental, 13 naman ang suspected leptospirosis deaths.
Ang leptospirosis ang isa ka bacterial infection nga makuha gikan sa infected nga ihi ukon higko gikan sa mga sapat kasubong sang ilaga nga naga contaminate sang pagkaon, tubig ukon sa duta.
Padayon ang pag abiso sang PHO sa pumuluyo nga likawan ang pag-ubog sa baha.