Nagpadulong sa National Bureau of Investigation kaina ang stepfather sang kinse anyos nga nasapwan patay sa katubuhan sa La Carlota City kasunod man sang pag subpoena sa iya. Indi siya cooperative sa imbestigasyon pero iya gin-ako ang pag molestiya sa 15 anyos nga dalagita.
Suno kay NBI Bacolod Chief, Manuel Fayre, Jr., indi pa luyag ni Rene John Nacis, alyas Negro nga mag cooperate sa NBI. Pero iya gin-ako ang pag molestiya sa iya nga stepdaughter nga si Pearl Joy Galve.
May pila ka mga kondisyones nga gin present ang NBI sa iya, kag isa na diri ang mangin state witness. May mga pamangkot ang NBI kag impormasyon nga luyag ikumpirma sa iya kag wala niya ini ginasabat suno kay Fayre nga naga pati man nga siya ang may ginatago. Suno kay Fayre, pagkatapos sang amo nga pagsinapol palakton na man lang siya sang NBI. Sa karon wala pa sang kaso nga ma-file sa iya angut sa pag kapatay kay Pearl Joy pero sila ang maga file sang kaso angut sa pag molestiya. Nagalaum ang NBI nga sa gihapon may maga cooperate sa kaso kag tigayon nila nga ma file ini. Ang NBI na ang maga pamuno sa filing sang kaso.
Samtang, may 30 gramos sang suspected shabu nga na recover gikan sa anay puluy-an nanday Nacis kag iloy ni Pearl Joy nga si Jennifer. Hulaton pa ang resulta kun bala shabu gid man kag usisaon kun paano ini napahamtang didto.
Asset sang Criminal Investigation and Detection Group si Nacis kag naghinyo ini sang bulig sang CIDG damlag pa para maklaruhan ang iya nga ngalan. Ginsiling na sadto ni Nacis nga wala siya sang kahilabtanan sa kamatayon ni Pearl Joy.
Sa interview sang media kahapon kay Fayre ginsiling sini nga si Jennifer Galve hungod wala naghatag sang pila ka impormasyo bangud may yara sang death threats sa iya gikan sa iya live-in partner nga si Nacis. Na missing si Pearl Joy sadtong July 29 kag nasapwan na lamang nga patay na sa La Carlota City sadtong Agosto 14.