Opisyal na nga nagsugod ang pag pangusisa sang National Bureau of Investigation sa ginreklamo nga ghost projects sa San Carlos City.
Suno kay Joe Recalex Alingasa ang spokesperson sang siudad, kahapon, Miyerkules, nagapadulong na sa San Carlos City ang tiglawas sang NBI NIR kag nakigsugilanon kay Mayor Renato Gustilo.
Opisyal na nga ginlunsar ang pag pangusisa kag angut diri suno kay Alingasa naghinyo ang NBI nga sa bahin sang LGU indi na mag release sang ano pa nga pahayag angut sa isyu pending sang imbestigasyon.
August 18 sang nagsulat kay NBI Director Jaime Santiago si Mayor Renato Gustilo kag nag hinyo sang pag pangusisa sa 306 million pesos nga balor sang suno sa iya mga ghost flood control projects sa San Carlos City upod sa tatlo ka mga contractors.
Ini nga mga contractor nagalakip sang EKC Construction and Aggregates OB nga nabase sa La Trinidad Benguet, Jaben General Contracting Engineering Services sa Baguio, Benguet kag A.P. O. Construction sa Mountain Province.
Suno kay Gustilo ang LGU wala nakasulod sa ano man nga kontrata sa sining mga kumpanya kag ang iya nga mga lagda nga nalakip sa mga dokumento gikan sa Notice of Award padulong sa Certificate of Final Acceptance ang gin peke.
Gin peke man ang lagda sang isa ka engineer suno sa sulat ni Gustilo.
Nahibaluan lamang ang amo nga anomalous nga transaction suno kay Gustilo sang nag sulat ang Procurement Service sang Department of Public Works and Highways Central Office para mag pa confirm sang authenticity sang mga documents angut sa amo nga mga proyekto.
“Nag meet sila kagapon. And they already launched the investigation, and once investigation is underway they requested sa side sang LGU nga indi mag release sang any information until further notice while the investigation is ongoing”, suno kay Alingasa.