May lead na ang National Bureau of Investigation sa identity sang nagapanag-iya sang frozen body parts nga nakit-an sa sulod sang sako sa atubang sang ila nga talatapan sang nagligad nga semana.
Suno kay NBI Chief, Atty Renoir Baldovino, magapadulong sa Bacolod ang team sang Technical Division nila para mag pat-od sang identity sang amo nga persona.
Suno kay Baldovino nakakuha sila sang impormasyon gikan man sa ila nga informant bahin sa identity sang natungdan nga suno sa iya isa ka lalaki nga drug personality kag taga Bacolod.
“Meron na kaming name nung tao. Mukhang may involvement sa drugs, based on reports na naibibigay sa amin. I cannot really ascertain, like ma sure na sa drug pushing. Lumalabas na male. But we need report from our Technical Division”, suno kay Baldovino.
Gin klaro naman sang NBI Chief nga wala sang pag ilinaway sa mga officer kag investigator sang NBI – Bacolod.
May naga gwa nga alegasyon nga may yara sang away sa sulod sang NBI.
“There is no truth to that. I bely that report na may feud sa inside ng NBI. Wala. We are intact”, suno kay Baldovino.
Dugang pa ni Baldovino kun napatay man ang CCTV sang NBI sang tion sang pagbilin sang sako nga naga unod sang body parts, ini ang natabuan lang kag wala ginhungod.
Naga pati si Baldovino nga tuyo sang responsable amo ang pag discredit sa NBI labi na nga masupog ang ila kampanya kontra sa iligal nga panahor.
Nagapabilin si Special Investigator William de Arca nga team leader sang ila nga anti illegal gambling operation.
Nakasulat sa paper bag nga yara man sa sulod sang sako ang mga tinaga: William de Arca, NBI protector ni Hanz Lopez, drug lord.