Bag-o nga pamuno sang Bacolod City Police nga si Police Colonel Joeresty Coronica nagmando nga padalman ang insidente sang pagpamakal sang identification cards sa kabalaka nga posible ini mangin pag panghangkat sa national security.
Bisan si BCPO Director Joeresty Coronica ang nagaduda sa ginahimo sang nagpakilala Filipino-Chinese nga babaye nga negosyante nga pagpanguha sang picture sang mga IDs sang taga Barangay Estefania kag Vista Alegre sa Bacolod.
Gani dapat ini nga padalman suno sa iya agud mapat-ud kun para sa diin gamiton ang identity sang mga nagbaligya sang ila IDs kabaylo sang P400.
Gindugang ni Coronica nga kasubong sini ang natabo nga insidente antes na-raid ang POGO operation sa Pampanga kag sa kaso ni Bamban Mayor Alice Guo.
Nagapanawagan siya sa publiko nga dapat mabinantayon sa mga makaduluda nga hilikuton nga sarang mangin hangkat sa national security.
Gindugang niya nga indi malipod nga tungod sang konplikto angut sa West Philippine Sea sarang nga maapektuhan sini ang seguridad sang pungsod.