Nag-gwa sa imbestigasyon sang Scene of the Crime Operatives, nga may sunog nga bahin ang natu-o nga kamot sang biktima nga nasapwan nga wala na sang kabuhi.
Siya ang nakit-an sa idalum sang puno nga yara sa higad sang highway sa Purok 8, Barangay Tangub sa syudad sang Bacolod, Miyerkules sang hapon, Agosto 27.
Sang nagapangita sang ID ang kapulisan agud nga makilala ang biktima, may nakuha sila nga kahita nga may unod nga tooter kag isa ka sachet sang ginasuspetsuhan shabu.
Ginsiling ni Capt. Greeky Cayao, hepe sang Station 8, nga posible nakuryente ang lalaki bangud mga las-11 sang aga, nakita ini nga may ginaguyod nga kuryente.
Nagahulat pa ang kapulisan sa pamilya sang biktima kun ipaidalum ang bangkay sa autopsy agud mahibaluan ang gintunaan sang iya kamatayon.
Wala sang may nakita nga foul play ang kapulisan bangud magluwas sa paso sa kamot sang biktima, wala siya sang iban nga pilas sa lawas.
Suno kay Cayao, anay maintenance personnel sang isa ka ospital ang biktima kag matinlo ang record sang biktima sa police station.