Sang nagligad lang nga Biyernes liwat nga ginpabuksan sang City legal Office Enforcement Team ang Akashya Grill sa 17th Street- Lacson matapos man makabayad sang P1,000 nga multa para sa pagsupak sang City Ordinance 565 ukon ang Revised revenue Code kag P500 para sa pagsupak sang pagsulundan angut sa pagbaligya sang makahulubog nga ilimnon sa mga menor de edad.
Suno kay City Legal Officer Atty. Romeo Carlos Ting, Jr., manubo ang multa nga nabase sa ordinansa.
Gani nagapati man siya nga kinahanglan nga ma-review kag ma-amend ang pagsulundan.
Sa record sang Business Permits and Licensing Office, Hulyo sang gin-surrender sang management ang business permit para sa single proprietorship.
Natalupangdan nga wala sila sang permit para mag-operate sa idalom sang natukod nga corporation amo nga sang Disyembre 18 ginpasirad-an ini sang siudad.
Gin-reklamo man sila sang barangay council sang Barangay 7 nga nag-recommend sa siudad nga pasirad-ad ang restobar bangud malapit ini sa mga eskwelahan.
Sa record sang BPLO nakakuha man sang barangay certificate ang restobar amo nga ini ang na-issuehan sang panibag-o nga permit nga maga-expire sa sini nga Disyembre 31.