41 ka mga indibidwal ang nadulaan sang balay sa sunog sa Burgos-Locsin streets, Purok Calachuchi, Barangay 9 sa Bacolod City, Miyerkules sang hapon.
Isa ang pamilya ni Ma. Fria Saratobias sa pito ka mga balay nga nasunog.
Ang manghod nga lalaki ni Saratobias ang ginahaya sa ila balay sang magluntad ang sunog.
Gintinguhaan sang mga himata nga mapagwa ang lungon sang napatay sa dalan.
Magluwas sa lungon sang ila utod, halos wala sang may nasalbar nga gamit ang pamilya ni Saratobias.
Nag-gwa sa imbestigasyon nga nagsugod ang sunog sa second floor sang balay ni Roberto Maligdong.
Ang balay nga ginhalinan sang kalayo ang tupad lang sang balay sang namatyan.
Suno kay Saratobias, bangud sa mabaskog nga hangin, halos duha lang ka minuto kag nagtabok na ang kalayo sa ila balay.
Kagab-i, ginbuligan ni Kapitan Madeline Diaz sang Barangay 18 ang pamilya Saratobias kag ginbayadan ang isa ka gab-i nga pagtiner sang bangkay sa Gegato-Abecia Funeral Homes.
Sa karon, paga-ediyahan sang pamilya nga mabutangan trapal kag maplastar ang bangkay sang ila utod sa gwa sang nasunog nila nga balay.
Suno sa report sang Bureau of Fire Protection, naglawig ang sunog sang kapin tunga sa oras kag nagdangat ang damages sa ginabulubanta P155,000.
Padayon pa ang imbestigasyon sa gintunaan sang sunog.*