Handa magkooperar sa ginapatigayun nga restoration efforts ang property owner nga nagpatukod sang pader sa Sulom Creek, Barangay Villamonte, Bacolod City, matapos ini gindagdagan sang cease and desist order.
Suno kay city administrator Atty. Mark Steven Mayo, nagpatigayon na sang conference ang siudad upod ang tag-iya kag ang abogado sini, kag nagpadala man ang property owner sang sulat sa siudad.
Ginpahayag ni Mayo nga nagpahayag ang tag-iya nga magakooperar siya sa restoration efforts, kun sa diin posible nga gub-on ukon kay-uhon ang parte sang ginpatindog nga pika-pika base sa resulta sang joint inspection.
Dugang pa sini, wala sang gastuhon ang city government sa restoration process. Ginpahibalo man sang tag-iya nga luyag niya magbutang sang garbage trap sa creek bilang bulig sa paglimpyo.
Sa pag padayon sang restoration efforts, ginhambal ni Mayo nga dapat masiguro nga masunod ang proper easement sa creek.
Ginpatukod sang tag-iya ang pika-pika agud proteksyunan ang iya warehouse nga nahamtang malapit sa waterway.*