Padayon ang pagsaka sang mga local cases sang COVID-19 sa Bacolod City.
Kahapon, may 81 naman ka mga bag-o nga kaso sa siudad.
Isa diri ang isa ka tuig nga bata nga close contact.
Base sa record sang Bacolod Emergency Operations center, wala sang may ginabatyag nga sintomas ang bata kag close contact ini sang isa ka nagpositibo nga kaupod nila sa sulod sang panimalay.
May duha man ka senior citizens nga nagpositibo sa virus pinaagi man sa household transmission.
Bangud sang padayon nga pagdamo sang mga kaso, nagdesisyon ang bacolod eoc nga palaparon ang ila targeted testing, pabakuron ang contact tracing kag dugangan ang mga isolation facilities.
Nagpasalig naman ang Bacolod City Police Office nga magahatag sila sang dugang nga mga pulis sa EOC para magbulig sa contact tracing bangud sang pagdamo sang mga kaso.
Ginpahayag naman ni Vice Mayor El Cid Familiaran, nga bisan ano pa kabantay kag panakop sang Task Force Disiplina sang mga wala nagasunod sa minimum health protocols, magadapayon ang pagsaka sang mga kaso sa siudad kun kulang sang disiplina ang pumuluyo.
Gani para sa iya, ang estrikto nga pagsunod sang health protocols ang makabulig sang dako sa pagpanubo sang mga kaso.