Nagdangat na sa 59 ang kumpirmado nga cholera cases sa Negros Occidental, samtang 27 naman ang cholera cases sa Bacolod City.
Sa report sang Bacolod City Health Office magluwas sa pag deklara sang cholera outbreak sa Brgy Mandalagan, napatuman na ang disinfection sa mga water sources nga apektado sang cholera.
Sa 276 ka mga water refilling station nga gin check sang CHO, 107 ang wala sang sanitary permit suno sa CHO kag 6 naman ang non-operational antes pa man gin patuman ang inspection. Gina recommend ang regulation sang mga water refilling station kag full implementation sang closure order sa wala sang permit.
Samtang, sa week 47, dose ang na record bag-o nga mga kaso sa Negros Occidental. Sa report sang Provincial Health Office, 22 ang cholera cases sang Talisay City nga nag record sang pinaka mataas nga kaso sa probinsya.
21 naman ang cholera cases sang kaiping nga siudad sang Silay. Ang banwa sang EB Magalona may 9 ka mga kaso, tig tatlo naman ang Victorias kag Cadiz City kag isa ang Manapla. Duha ang napatay bangud sa cholera sa probinsya.
Padayon naman ang pagpangusisa sa mga suspected kag confirmed case sang cholera suno sa PHO. Padayon man ang pagpadala sang water samples para sa laboratory testing gikan sa mga lugar nga apektado sang cholera.