Masobra sa 4,700 ka mga kasapatan ang nagkalamatay bangud sang epekto sang paglupok sang bulkan Kanlaon.
Sa report sang Office of the Provincial Veterinarian, as of July 2, 4,764 ka mga kasapatan gikan sa Bago City, La Carlota City kag La Castellana ang nagkalamatay.
Suno kay Dr Placeda Lemana, kalabanan sa mga napatay poultry ukon mga manok – 4,488.
May mga gin-report man nga nagkalamatay nga baboy, baka, carabao kag kanding.
Sa report sang OPV P1,248,000 ang balor sang kahalitan.
Suno kay Lemana magluwas sa mga nagkalamatay may mga sapat man nga nagmalasakit, pero ini sila ang natatapan paagi sa veterinary medical mission nga ginpatigayon sang OPV upod sa mga LGU kag partner organizations sini.
Nagapadayon man ang veterinary medical mission sa pila ka mga barangay sang La Castellana nga labing naapektuhan sang paglupok sang bulkan.
“Ang report da namon sa kay Gov, mortality na siya, patay gid na siya ya. So ang aton gina obra subong sa reported nga morbidity, naga schedule kita sang medical mission kag naga hatag kita sang ga supplements, powder form lang para ang farmers kabalo mag administer sa ila nga sapat”, suno kay Lemana.