Gina-ayam karon sang otoridad ang isa ka persona nga ginatudlo nga sa likod sang pag kuha sang sexual videos sa mga kabataan sa Bacolod City kag pagbaligya sini sa mga foreigners.
Ginsiling ni Richelle Verdeprado-Mangga pamuno sang Department of Social Services and Development nga sumugod Hunyo tubtob sa karun, may pulo na tanan ka mga kabataan nga naga edad 12 tubtob 17 anyos ang tigayon nga na rescue.
Siyam sa ila ang lunsay mga babaye samtang isa naman ang lalaki.
Suno kay Mangga, na-rescue gikan sa nagkalain-lain nga mga barangay sa Bacolod ang kabataan, apang isa lamang ka persona ang ginatudlo nila nga naga-facilitate sa amo nga aktibidad.
Samtang gina-usisa man sang otoridad ang mga ginikanan sang iban sa mga kabataan nga posible imbulbado man sa amo nga aktibidad.
Iban sa mga balay nga na-raid sang otoridad, ang gina-arkilahan lamang. Masami nga ginapatigayon ang ini nga aktibidad sa mga suludlon nga mga lugar sa siudad.
Sandig sa panaysayon sang mga biktima, ginasugo sila nga mag perform sang mga sexual acts samtang ginavideohan sila gamit ang cellphone. Ini ang ginabaligya man sang facilitator sa iban nga mga pungsod.
May mga kaupdanan pagid nga mga kabataan ang mga biktima, kag padayon pa nga ginapangita sang otoridad.
Ginakabig man sang DSSD nga alarming ang ini nga insidente matapos nga nagwa sa pagtulun-an sang International Justice Mission nga isa ka hotspot ang Bacolod City sang Online Sexual Abuse and Exploitation of Children.
Magluwas sa mga kabataan nga na rescue, may iban pagid nga mga persona ang na rescue man sang DSSD nga biktima nga human trafficking.
Sa karun yara sa paghinakop sang DSSD kag sang kapulisan ang mga biktima.
[sibwp_form id=1]